वीरगंजमा माघी महोत्सव भव्यरुपमा मनाउने तयारी

वीरगंज, २९ पुष । वीरगंजमा थारू समुदायले माघे संक्रान्ति भव्यरुपमा मनाउने तयारी गरिएको छ । माघी समारोह आयोजक समितिले आइतवार वीरगंजमा पत्रकार सम्मेलन गरेर सो जानकारी गराएको हो ।
थारुहरुको नयाँ वर्ष खिँचडी अर्थात माघी पर्ब सोमवार वीरगंजको पूरानो बसपार्कमा माघी समारोह आयोजना गरिने भएको छ । थारू समुदायको नयाँ वर्ष थारू सम्वतः २६४८ को शुभकामना आदानप्रदान, भाषा तथा सास्कृंतिक कार्यक्रमसमेत गरिने समितिका संयोजक शेखर चौधरीले बताए ।
सोमवार माघ १ गते बिहान वीरगंजको घण्टाघरदेखि पुरानो बसपार्कसम्म थारू सस्ंकृति झल्कने झाँकीसहित प्रभातफेरी निकाल्ने र पूरानो बसपार्कमा औपचारिक कार्यक्रम राखिने संयोजक थारूको भनाइ छ ।
पत्रकार सम्मेलनमा थारू कल्याणकारी सभाका केन्द्रीय सदस्य ननदकिशोर पञ्जियार, प्रचार प्रसार संयोजक शम्भु महतो थारू, दिपेन्द्र चौधरी, बिजया ओझैया, मनोज चौधरी लगायतको सहभागीता थियो । कार्याक्रमको सञ्चालन पुनम चौधरीले गरेका थिइन् ।
यसैगरी जीतपुरसिमरा उपमहानगरपालिका वडा नं. ११ खैर्वा खेल मैदानमा आइतवारदेखि दुर्ई दिन थारू माघी (तिला संक्रान्त) संस्कृति उत्सव शुरू हुँदैछ । उत्सवको एक कार्यक्रमकाबीच मधेस प्रदेशसभा सदस्य देवनारायण चौधरीले उदघाटन गर्नेछन् ।
यसैबिच पर्सा जिल्लाका पाँच स्थानमा यसवर्ष माघी महोत्सवको अवसरमा कार्यक्रमको आयोजना गरिएको छ । वीरगञ्ज महानगरपालिकासहित पर्साको पटेर्वासुगौली गाउँँपालिका, जीराभवानी गाउँँपालिका, पर्सागढी नगरपालिका र सखुवाप्रसौनी गाँउपालिकामा माघी महोत्सव मनाउने तयारी भईरहेको हो ।