पौस, २१ वीरगंज । मधेश प्रदेशका खेलकुद तथा समाज कल्याण मन्त्री प्रमोद जयसवालले पत्रकार जियालाल साहलाई धम्की दिएको विषयमा आफ्ना शुभचिन्तकले गल्ती गरेको स्वीकार्दै उक्त कार्यलाई तत्काल सच्याइएको बताएका छन् ।
आइतबार आयोजित पत्रकार सम्मेलनमा मन्त्री जयसवालले पत्रकारलाई धाकधम्की दिनु गलत रहेको स्पष्ट पार्दै आफूले त्यस्तो कार्यलाई समर्थन नगर्ने बताए । उनले गल्ती तुरुन्त सच्याउन निर्देशन दिएको दाबी गरे । मन्त्री जयसवालले भने, “गलत कुरालाई साथ नदिने हाम्रो सिद्धान्त हो । गलत काममा हामी संलग्न हुने कुरै आउँदैन ।”
साथै, उनले सिधाकुरामा अभियुक्तको रूपमा नाम आए पनि अदालतबाट सफाइ पाइसकेको दाबी गरे । तर, पर्सा जिल्ला अदालतको वेबसाइटमा भने ज्यान मार्ने उद्योग, डाँका, चोरी र आपराधिक उपद्रवको मुद्दा (नं. ०७९–सी१–०२१३) मा सजाय निर्धारण फाँट नं. २ मा पुस २१ अर्थात आज सुनुवाइ हुने उल्लेख रहेको छ ।
पत्रकार सम्मेलनमा मन्त्री जयसवालले एक लाख ५० हजार रुपैयाँ धरौटी तिरेको कुरा स्वीकार गर्दै उनले पत्रकारहरुले अदालतको वेबसाइटमा मुद्दा अझै चालु देखिएको उल्लेख गर्दा उनले अरू दोषीहरू समेत मुद्दामा संलग्न भएकाले आफ्नो नाम पनि देखिएको बताए । साथै, अदालतको विवरण अपडेट नभएको प्रतिक्रिया दिए ।
जयसवालले पत्रकार सम्मेलनमा अदालतको निर्णयको छोटकरी विवरण प्रस्तुत गर्दै तथ्य ठोस प्रमाणबाट पुष्टि नभएकाले आफू सफाइ पाएको बताए । उनले प्रधानमन्त्री केपी शर्मा ओली आफ्नो गाउँपालिकामा आएका बेला हजारौं समर्थक र कार्यकर्ताहरू नेकपा एमालेमा प्रवेश गरेको देखेर विपक्षीहरू आत्तिएको र दुष्प्रचारमा उत्रिएको आरोप लगाए । उनले विरोधीहरूको प्रचारलाई खण्डन गर्दै आफ्नो पक्षमा जनसमर्थन रहेको दाबी गरे ।
