बैशाख, १९ वीरगंज । पर्सा जिल्लाको बहुदरमाई नगरपालिका–२ स्थित श्री नेपाल राष्ट्रिय माध्यमिक विद्यालय, सिसियाडी बैरियामा नयाँ चार कोठे सुविधा सम्पन्न विद्यालय भवनको शिलान्यास गरिएको छ । ५५ लाख रुपैयाँको लागतमा निर्माण हुने उक्त भवनको शिलान्यास आज बहुदरमाई नगरपालिकाका नगरप्रमुख सिंगासन साह तेलीले गरेका हुन् ।
२०६३ सालमा कक्षा ५ सम्मको कक्षा सञ्चालन गर्दै स्थापना भएको विद्यालयलाई पछिल्लो समय आधारभूत तहसम्म विस्तार गरिँदै आएको थियो । २०८० सालमा कक्षा ९ को अनुमति प्राप्त गरेको विद्यालयले अब आगामी शैक्षिक सत्र २०८२ देखि कक्षा १० सञ्चालन गर्ने अनुमति समेत पाएको छ । मेयर साहले शिलान्यास कै अवसरमा विद्यालयलाई कक्षा १० सम्म पढाउन स्वीकृति दिने औपचारिक घोषणा गरेका हुन् ।
माध्यमिक तहको अनुमति, सिसियाडीका बालबालिकाका लागि ऐतिहासिक उपलब्धि
शैक्षिक संरचना अपूरो हुँदा कक्षा ८ पछि धेरै विद्यार्थी—विशेषगरी बालिकाहरूले पढाइ छोड्ने स्थिति रहँदै आएको थियो । कक्षा १० सम्मको अनुमति प्राप्त भएपछि विद्यार्थीलाई अन्यत्र जानुपर्ने बाध्यता हटेको छ । अभिभावकहरूका अनुसार अब गाउँमै माध्यमिक तहसम्मको शिक्षा उपलब्ध भएपछि छोराछोरीको भविष्य सुरक्षित हुने भएको छ ।
वडा नं। २ का वडा अध्यक्ष जितेन्द्र पटेलले भने, “अब कम्तीमा नुनभात खाएर भए पनि छोराछोरीले पढ्न पाउने बेवस्था भएको छ । पहिला जस्तो पढ्ने सुविधा नभएर घरमै बस्नुपर्ने अवस्था हटेको छ ।”
आधुनिक प्रविधिसहितको कक्षा कोठा, विज्ञान प्रयोगशाला र पुस्तकालयको व्यवस्था
विद्यालयका प्रधानाध्यापक विजय कुमार साहका अनुसार यसअघि राष्ट्रपति शिक्षा सुधार कार्यक्रम, वडा कार्यालयबाट निमार्ण भएको भवन अहिले नगरपालिकाको संयुक्त लगानीमा निर्माण हुँदैछ । नयाँ भवनमा विज्ञान प्रयोगशाला, पुस्तकालय, अडिटोरियम तथा स्मार्ट बोर्डसहितको प्रविधियुक्त कक्षा कोठा निर्माण गरिने योजना छ । “हाल विद्यालयमा १५ वटा कम्प्युटरमार्फत विद्यार्थीहरूलाई कम्प्युटर शिक्षा दिइरहेका छौं,” प्रधानाध्यापक साहले भने, “अब नव निर्माण भवनमा विज्ञान र प्रविधि केन्द्रित शिक्षाको थप विकास गरिनेछ ।”
बहुदरमाई नगरपालिकामा कन्या विद्यालय निर्माणको घोषणा
कार्यक्रमलाई सम्बोधन गर्दै नगरप्रमुख सिंगासन साह तेलीले भने, “शिक्षा सुधारमा शिक्षक मात्र होइन, अभिभावक र सम्पूर्ण समुदायको समान भूमिका रहन्छ ।” उनले छोरीहरूको शिक्षामा बढ्दो सहभागीता देखिएको उल्लेख गर्दै नगरपालिकामा छोरीहरूका लागि छुट्टै कन्या विद्यालय निर्माण गर्ने घोषणा गरे ।
कार्यक्रममा स्थानीय अभिभावक, शिक्षक, जनप्रतिनिधि तथा नगरस्तरीय पदाधिकारीहरूको उल्लेखनीय उपस्थिति थियो ।
