वीरगंज, २ फागुन । मानव बेचबिखन कार्यमा संलग्न रहेको भन्दै जिल्ला प्रहरी कार्यालय, पर्साले दुईजनालाई पक्राउ गरेको छ । बिहीवार वीरगंज महानगरपालिका–१५ स्थित होटलहरुमा प्रहरीले चेकजांच गर्ने क्रममा मानव बेचबिखन कार्यमा संलग्न रहेको भन्दै वीरगंज–१६ बस्ने वर्ष ४५ को गिनीलाल गुप्ता र भारत, बिहार पूर्वी चम्पारण, नकरदेही, भवानीपुर–६ बस्ने वर्ष ४० को प्रकाश साहलाई पक्राउ गरिएको जिप्रका, पर्साका प्रवक्ता प्रहरी नायब उपरीक्षक सुवास भट्टले जानकारी गराए । प्रहरीले सो स्थानका होटल स्मार्टबाट दुई जना र न्यू शान्ति सैनिक होटलबाट दुई जना गरी चारजना महिलाहरुको उद्धार गरेको छ । उद्धार गरिएका महिलाहरुका अनुसार साह र गुप्ताले होटलमा आएका ग्राहकहरुसंग शारीरिक सम्पर्क राख्न लगाई वेश्यावृत्तिमा संलग्न गराएको आरोपमा प्रहरीले पक्राउ गरिएको जनाएको छ । पक्राउ परेका दुवैजनामाथि मानव बेचबिखन तथा ओसारपसार नियन्त्रण ऐन २०६४ बमोजिमको कसूरमा थप अनुसन्धान भइरहेको जिप्रका, पर्साले जनाएको छ ।
प्रतिक्रिया लेख्नुहोस्
